ياسلام جمله جميله والله أول ما تقولها كدا قدام حد هايكون ردوا اهههههههههههههه طببببببببببببببببببعا هو فى احلى من الصراحه أمال ايه . وهاتلاقى اللى يقولك ااقرب طريق بين نقطتين هو الخط المستقيم خليك دايركت يا مااااااان .
صح والله يمكن يكون عندهم حق كلام جرايد بصحيح بس هو أحنا بجد بنتعامل بصراحه دايما ... يعنى بينا وبين الناس اهلنا أصحابنا او نفسنا او حتى بينا وبين عم تونى البقال اممممممممم ما اعتقدش عينى فى عينكوا كدا.
أنا هنا مش بتكلم عن الكدب وأنواعوا وأشكالوا مش هنخلص بقى انا بتكلم عن الصراحه... يعنى ايه؟؟
إن مشاعرك وافكارك تبقى واضحه وبتبرق زى شمس يوليو كدا مافيش حد مابيشوفهاش.
بجد انا شايفا ان دا شىء صعب جدا مش مستحيل مافيش حاجه بعيده على ربنا بس بجد انك تكون صريح دى حاجه خارقه. بس دا ماينكرش إن فى ناس ماشيه تعبر أربعه وعشرين ساعه عن مشاعرها او عن اى حاجه تخطر ببالها بس انا شايفا إن الناس دى بتتصنع وعاوزا تجذب الانتباه وخلاص يعنى شايفين نفسهم بيعملوا حاجات عظيمه وتستحق إن الناس الغلابه اللى زي حالاتنا لازم يعرفوها يمكن نستفيد يعنى .... انا عن نفسى لما بقابل حد من الاشكال سورررى الشخصيات دى بكبر دماغى يا إما بسمعهم وانا سرحانه فى أبن الجيران يا إما بخدها من قصيرها وأمشى من وشهم. انا مش بتكلم عن الناس دى انا بتكلم معاكوا انتوا بما أننا ناس طبيعين -المفروض يعنى- ماعلينا خلينا فى موضوعنا هو إحنا بنتكلم فى ايه نسيتونى ؟؟؟؟ اه افتكرت الصرااااحه
صراحه فى كل حاجه مشاعرك واضحه جدا عارف إنتا عاوزا ايه من اللى قدامك حافظ نفسك وعارف كل حدودها وإمكنياتها واللى تقدر تعملوا او ماتعملوش دا بخصوص الصراحه مع نفسك ، أما بقى انك تكون صريح مع الناس ازاى ... مثلا بنت بتحب واحد تروحلوا وتبص فى عينوا كويس وتقولوا انا بحبك عااااااااااااادى واحده وبتعبر عن مشاعرها الاحتمال الاكبر أنوا يديها بالقلم بس عااااااااادى مش دى برضوا اسمها صراحه بس للاسف فى مجتمعنا الشرقى الذكورى دى اسمعها وقاحه ماعلينا ...
طيب ينفع كمان ولد يروح يقول للحج الوالد انا بحب السجاير ومقتنع بيها وناوى اشربها بعد اذنك طبعا يا حاج برضوا ما اعتقدش طيب ينفع موظف غلبان يروح يقول للمدير المفترى أنتا حمار ومابتفهمش اى حاجه مممممممم واسعا شويه مش كدا.
كلنا انتعودنا على الكبت يوم وراء يوم كبت كبت كبت هو دا اللى إحنا فالحين فيه لكن إننا نكون صرحاء ولو على رقبينا زى ما بيقولوا تبقى أكيد مجنون.
وفى حاجه كمان الصراحه الزايده وخاصة فى المشاعر بتخلى الواحد مكشوف اوى يعنى إنك تبقى ماشى كدا فى الشارع لابيك ولا عليك وتلاقى الناس كلها عارفا انك بتحب فلانه بس مش قادر تقولها لان الهانم بتحب صاحبك تخيل شكلك بقى وحتى فى علاقات الحب تلاقى الواحد ولا الواحده يقولك انا مش لازم ابينلوا حبى ليه أد إيه مش لازم يشوف لاهفتى عليه لازم اتقل عليه لأ إما هايستهتر بمشاعرى ومش هايعملى حساب . علشان كدا بنتعلم إزاى نخبى مشاعرنا لا وكمان ايه نلونها ونشكلها علشان تبان غير الحقيقه تماما .. وأول ما تشوف الشخص اللى انتا بتحبوا تفضل تدعي عليه ساعه ليه دا كلوا لحسن يا خد بالوا أنك بتحبوا ...
يمكن فى ناس تقول على دا إنوا نفاق ممكن تكونوا صح لكن المنافق دا شخص بيأذى اللى حوليه. بس انك تخفى مشاعرك علشان ماتنجرحش ساعتها أنتا مابتأذيش الا نفسك ودا ماسمهوش نفاق يعنى دا رأى واختلاف الرأى لا يفسد للود قضيه فى مجلس الشعب بيسجن المعارضه بس ....
المهم انا عاوزاكوا تردوا عليا علشان أعرف يعنى ايه صراحه وهى بجد حاجه صعبه زى ما انا بقول ولا عندكوا رأى تانى هاستناكوا اوعوا تتأخروا ... ايه دا انا وصلت حاسب على جنب والنبى يا أسطى ... سلااااااااااااام.