مش عارف بصراحة ليه الفرنساويين بيتكلموا فرنساوي؟؟ يعني إيه لزمتها مطة الدلع اللي في الآخر دي.. وكمان شوية الشرطات اللي فوق الحروف.. شوية ع اليمين وشوية ع الشمال، واحنا مش فاهمين أي حاجة.. يعني فيها إيه لما الفرنساويين يحسنوا مجموعهم ويتكلموا إنجليزي؟؟! على الأقل يوفروا وقت في مط الحروف.. مش عارف ليه الفرنساوي بيفكرني بـ"هند رستم" في دلعها.. إنما الإنجليزي حِمِش كده بيفكرني بـ"عتريس" في (شيء من الخوف).. يعني معلومات اسمها (إنفورميشن).. خلاص انتهينا.. حمش حمش يعني.. إنما بالفرنساوي اسمها (إنفورماسيووووو) صلاة النبي.. ويا سلام لو الواحد أخنف أصلا بقى.. وللاّ عنده لدغة في الراء.. ده يبقى فرنساوي بتاع بلده صح!!
أنا كل علاقتي بالفرنساوي بدأت في الثانوية هي النشيد اللي في أول صفحة في كتاب سنة أولى.. بتاع (أنا اسمي "جون"، وعندي أخت اسمها "مارتين")..غير كده اعتبر إنك بتكلم عالم سمسم!!
المدرس يوقفني في الفصل: اسمك إيه؟
أجاوب بالفرنساوي طبعا: أنا اسمي "جون"، وعندي أخت اسمها "مارتين".
ـ طب عندك كام سنة؟
ـ حضرتك قلت لك: أنا اسمي "جون" وعندي أخت اسمها "مارتين" بقى..
ـ يا بني طب كيف حالك؟؟
ـ يا دي الغباء بقى.. بيجيبوهم منين دول؟؟ يا عم الذكي باقول لحضرتك: أنا اسمي "جون" وعندي أخت اسمها "مارتين".. أظن واضحة يعني!!
نجحنا في الثانوية، ورحت قسم إنجليزي، بس لقيت فيه مادة فرعية فرنساوي.. وطبعاً باحمد الله عديت من كل المواد الإنجليزي ما عدا الفرنساوي، مع إنها مادة فرعية أي كلام يعني.. أول سنة أنجح بس معايا الفرنساوي.. تاني سنة برضه.. تالت سنة برضه.. يا جماعة أنا كده بقيت (مُعيد) في الفرنساوي مينفعش كده.. لازم حل..
دخلت آخر سنة بقى بامتحن آخر امتحان للفرنساوي.. قعدت في اللجنة، ولقيت واحد قاعد قدامي قال لي: هو إنت "أشرف توفيق"؟؟
قلت: ما شاء الله.. هو التليفزيون اللي فاضح الواحد كده!! أيوه حضرتك..
ـ أصل أنا وانت الوحيدين اللي شايلين المادة دي أصلا في الكلية.. والدكتور عارفك بالاسم..
ـ ما شاء الله.. طب كويس.. والدكتور ماقالكش تبلغني رسالة شكر وللاّ حاجة؟؟
ـ نعم؟؟
ـ لا خلاص.. قول لي.. إنت ذاكرت الكتاب بقى بتاع الفرنساوي؟؟
ـ كتاب إيه؟؟
ـ كتاب الفرنساوي بتاع السنين اللي فاتت.. مش ده اللي هنمتحن فيه؟؟
ـ يا عم الدكتور لغى الكتاب أصلا.. وجاب لي ورق هو اللي هييجي منه الامتحان!!
ـ طب والناس اللي هيمتحنوا في الكتاب القديم حضرتك قاعدين فين دلوقتي بقى؟؟
ـ يا عم مفيش كتاب قديم خلاص!..
طبعاً كانت مفاجأة عصيبة.. إذا كان أنا أساسًا بقالي كام سنة شايل المادة اللي أنا بدأت أحفظ أسئلتها.. أمال لما تيجي أسئلة تانية من دروس تانية مكتوبة أساسًا باللغة السنسكريتية دي ها اعمل فيها إيه؟؟
طبعًا من قبل ما نتكلم إزاي هنغشّ إن شاء الله.. المراقب جه وقال: يا جماعة لما الامتحان يبدأ اللي عايز حاجة ياخدها من التاني عادي.. تعاون تعاون يعني!!
قلت له: حضرتك إحنا بقالنا أربع سنين شايلين المادة دي.. إحنا ميييييح أساساً.. يعني لو سبتنا مع بعض احتمال نخلي الدكتور هو اللي يشيل المادة!!
بدأ الامتحان.. وطبعاً أول سؤال كان بيقول: تكلم عن السياحة في مصر.. وبما أني حافظ إجابة السؤال ده بالحرف.. فكتبت بالخط العريض:
ـ أنا اسمي "جون"، وعندي أخت اسمها "مارتين"!!
وبعد شوية:
ـ "أشرف"؟؟ إنت عملت السؤال بتاع صح وغلط؟؟
ـ هو رقم كام ده؟؟
ـ يا بني السؤال الرابع..
ـ بس السؤال الرابع ده مفيش قدامه أقواس!!
ـ متقلقش.. هما بس عايزين يغلطونا.. بس على مين!!
ـ يا بني يغلطونا إيه؟؟ الدكتور عارف إنه لو جاب الامتحان بالعربي هنسقط برضه.. هيّه ناقصة غلطات؟؟
ـ يا عم صدقني..
ـ خلاص.. إنت حر.. عموما ما دام السؤال الرابع طلع صح وغلط بقى.. الاتنين الأولانيين صح.. والتانيين غلط.. والأخيرة أنا شاكك فيها!!
ـ متأكد؟؟
ـ طبعا يا بني.. أنا حالل الامتحان كله في أول خمس دقايق.. ومتنساش أنا برضه "جون"، والأجر على الله، وعندي أخت اسمها "مارتين"!!
ـ طب خد المسطرة دي هتلاقي عليها إجابات الامتحان اللي أنا حليته..
ـ طب ما تجيب الورقة أسهل يا بني ما دام كده كده بنحل سوا أساساً!!
ـ لا يا بني اتق الله.. حرام!!
ـ فعلا عندك حق!!
أخدت المسطرة وعشت بقى.. طبعا اللي بيغشش مش فاهم حاجة واللي بيغش مش فاهم حاجة.. تصوروا بقى اللي اتكتب كان إيه أساساً؟؟
اللي أنا فاكره إنها كانت كلمات إنجليزي تماماً بس عليها شوية شُرَط بقى.. إشي ع اليمين وإشي ع الشمال.. وإشي في النص.. شكِّلت الورقة كلها -بالصلاة على النبي- نحوياً فتحة وضمة وكسرة.. زي الفل..
طلعنا من الامتحان مية مية.. الولد راح يقابل الدكتور عشان يراجع معاه.. وطبعا أنا واقف بعيد ولا أعرفه يا حضرة البكباشي.. مراجعة إيه حضرتك؟؟ الدكتور ده لو قال ألماني أنا هاصدقه!!
الولد قال للدكتور: يا دكتور هي إيه إجابات السؤال بتاع صح وغلط؟؟
رد الدكتور باستغراب: صح وغلط إيه يا بني؟؟ مفيش في الامتحان صح وغلط!!
ـ أمال السؤال الرابع ده بتاع إيه؟؟
ـ ده بتاع صحَّح الجملة..
طبعا أنا سحبت الواد من إيده.. عشان نهرب من الموقف.. بس السؤال اللي كان شاغل دماغي ومخليني قلقان: يا ترى مين فينا اللي هيطلع الأول ع التاني؟؟ ولو هو طلع الأول عليّ.. يبقى يا ترى مين اللي وراه؟؟
