وانا باتصفح احد المنتديات لقيت موضوع لشاب شكله محبط اوي
وبيكلم عن ظروف الناس والحب وازاي نقدر نحب والدنيا غلا حولينا
فحبيت انقلكم الموضوع واشوف ايه رأيكم في الكلام ده
وبيقول
أمبارح بالليل كنت بتفرج على فيلم ( يوم من عمري ) بتاع عبد الحليم وزبيدة ثروت .. ورجعني الفيلم لأيام الزمن الجميل زمن الحب .. لكن لفت انتباهي أغنية رائعة ( خايف مرة أحب )
وكانت بتقول
خايف مرة أحب .. و خايف ينسى الحب يوم يقابلني
خايف أجرب .. خايف أهرب خايف أأقرب يبعد عني
ناس من الحب شافوا قاسية .. و ناس إتهنوا
خايف يقسى الحب عليَ .. خايف منه
أندم لو حبيت و قاسيت
و أندم لو عمري ما حبيت
بس لو ألاقي اللي أحبه
و اللي قلبي يروح لقلبه
و اللي ترتاح روحي جنبه
يومها عمري ما أبقى خايف
ومعناها طبعاً هو موضوعنا النهاردة اللي هنتكلم عنه ..
فيه حد مننا له نفس يحب دلوقتي ؟! هتسألوا طبعا وتقولوا ليه؟ ( قرب يا بني انت وهي علشان تركزوا)
حتحب ازاي وانت مفيش في جيبك تمن كوزين درة مشوى ولا حتى كوباية حمص الشام ( بيقولوا عليه حلابسة )
طيب بلاش دي .. حتحب ازاي وانت خايف اساساً تروح تتمشى على الكورنيش علشان ممكن أي أمين شرطة يمسكك ويمسح بيك الرصيف والشارع ومش بعيد يرميك في النيل طبعاً انت راجل ومش مهم يحصل معاك كدة المهم انه ميحصلش قدام حبيبتك
تحب ازاي ومفيش امان يا معلم .. ولا فيه فلوس والغلا عمال يزيد .. طيب وبعدين ..
ابداً .. الحل في ايدك أنت .. وأول حاجة تعملها أنك متفكرش في مسألة الحب من أساسه مش كدة وبس
أنت كمان لازم لو لقيت حد بيحب قدامك حاول تلحقه وتفهمه انه كدة بيرمي نفسه في التهلكة
وان كنت اظن انك مش هتلاقي ولو تحب تجرب اقول لك
بص في وشوش الناس اللي في الشارع .. في المترو وفي الأوتوبيسات كمان .. شوف كام واحد حالق دقنه .. كام واحد مبتسم تقدر تقول لي بتقابل كام واحد بيضحك وانت ماشي في الشارع كل يوم
طيب تعالى نجرب ابقى أتأمل في وشوش الناس كام يوم وابقى قابلني .. أحم قصدي ابقى قول لي لقيت ايه ؟
هاا ايه رايكم في الكلام ده
شايفين الحب فلوس ومعيشا والحاجات دي
انا رأيي ان ظروف زمنا هي اللي دفعته للكلام ده
وبصراحه انا شايفه ان ما غلطش
بس الحب الطاهر بعيد عن كل حاجه مشاعر دافيه وصافيه
بس شبابنا دلوقتي حولها لمصالح مابقاش في عواطف ومشاعر زي زمان بس المفروض
ان بيتقال ان
الحب الحقيقي يتحدي الدنيا كلها
وعايز اشوف رأيكم انتم ايه