في يوم من الأيام كنت قاعدة مع واحدة أتعرفت عليها .......
..... قعدنا نتكلم في كلام عام بحكم إننا لسه متعرفين قريب ، ومش عارفة إيه اللى فتح موضوع العرسان والخطوبة والكلام ده ، والبنت بقى قعدت تقولي إن بيتقدملها عرسان كتير وهى بترفضهم ، ها.... ها.... ها..... والكلام جاب بعضه فعرفت منها هي ليه بترفض العرسان بالشكل ده وعرفت كمان إيه المواصفات اللى عايزها تكون في الشخص اللى هترتبط بيه وقدرت افتكر بعض الحاجات اللى قالتلى عليها وكانت :
- إنه يكون أمور وشكله وسيم .
- انه يكون لذيذ والابتسامة مالية وشه (علشان مش ناقصة قلبت وش) .
- انه يكون ذهنه حاضر ومصحح وبيفتكر المناسبات وبيجيب هدايا كتير .
- انه يكون بيموت في الشارع والفسح والخروج والتنطيط .
- انه يكون لبلب ولسانه بينقط عسل .
- انه يكون مش متسلط ( يعنى من أيدي دية لأيدي دية ) .
- انه يكون شيك وبيعرف يلبس وجينتل ( علشان الترقية ) .
- انه يكون مالوش صحاب ولا بيحب القهاوى .
- انه يكون بيقبل صاحباتي ومش بيكرههم علشان الخروج والزيارات والذي منه .
- انه يكون (صيته من دماغه) ومبيرجعش لأهله في أي قرار ليه .
طبعا الكلام ممكن يكون مش منطقي بس بجد أنا كمان استغربت ، لان لو فعلا دى مواصفات فتى الأحلام أو الشخص اللى عايزة تقضى معاه باقي عمرك يبقى إحنا كده عندنا مشكلة كبيرة في التفكير ولسه كمان عقلنا مش ناضج بالدرجة اللى تسمحلنا بالارتباط والجواز ، ومع إن المواصفات اللى اتقالت دى ممكن تكون مهمة عند كتير من البنات ، بس الأكيد إنها مش أهم المواصفات اللى ممكن تخليني أوافق على شخص أو ارفضه .
بجد لو اكتشفتى انك بتفكري بالطريقة دى يبقى من الأفضل انك متتجوزيش دلوقتى خااااااااااااااااااااااااااااااااااااااااالص واستني كده لما تفهمي يعنى إيه جواز .
