ايها الشباب ........افيقوااااااااااااااااا

كلنا أحيانا بيبقى عندنا اهتمامات كتير وحاجات لازم نعملها كل يوم ، وأحيانا الحاجات ديه هيه اللي بتمشى يومنا وبترتبه على مزاجها ... أديك مثال يا سيدي التليفزيون مثلا في ناس معدل تعرضهم للتليفزيون مش اقل من 10 ساعات يوميا ، وبيظبط نومه واكله وخروجه على مواعيده معاه . وفى ناس تانية عندهم نفس القصة ديه مع الكمبيوتر والانترنت والgames ، وفى ناس تانية بيبقوا كده واكتر مع الناس اللى بيحبوهم ، يعنى مثلا أنتي يافندم بترتبي نومك وخروجك ورنتك وموبيلك وأصحابك وكل حاجة في يومك على الpartner بتاعك .

والرسول "عليه الصلاة والسلام" قال في حديث فيما معناه انه سوف يأتي كل امرئ يوم القيامة خلف ما يعبد فمن الناس اللي هتقف خلف الأصنام ومنهم هيقف خلف الشهوات مثلا الفلوس أو النساء ...

والكلام ده معناه إن العبادة مش عبادة آلهة وبس ، ولكن ممكن من كتر ما بتهتم بحاجة تعبدها ... الكلمة أكيد تقيله علينا وكلنا هنقول لأ طبعا إحنا مش بنعبد غير ربنا ، أكيد طبعا كلنا بنقول "لا اله إلا الله" ومؤمنين بيها لكن العبادة إيه غير انك تتعود على حاجة وتأخذ كل يومك والمفروض تكون الحاجة اللى بتحبها تبقى هي رضا ربنا عليك يعنى ترتب ساعات يومك كلها بالطريقة اللى ترضى ربنا ، لكن المشكلة إننا بنهتم بحاجات من غير ما نحس بتتحول عندنا لإدمان.

وهوة ده اللى نزلنا وسألنا الشباب عليه وسألنهم إيه هيه الحاجات اللى بتعملها في يومك وحاسس انك متقدرش تستغني عنها ومن إجابتهم هتعرف أد إيه محتاجين نرتب اهتماماتنا وساعات يومنا بالطريقة اللى تخلينا إيجابيين


" وجون وجون وجون وجون "

- "محمد 20 سنة" : الحاجة اللى بهتم بيها أوى اوى وتقريبا هيه اكتر حاجة بفهم فيها وهيه "الكورة" وأنا أهلاوي طبعا بس المشكلة إني مش يتابع "الماتشات" المصرية بس لكن بتابع دوري انجلترا واسبانيا ، وقنوات الرياضة مفتوحة طول اليوم في البيت وأنا وأصحابي كل كلامنا عن اللاعبية وآخر أخبارهم ، وكل أوضتى مليانة بوستراتهم .

- أما "شادي 18 سنة" : اكتر حاجة بحبها إني أروح النادي وألعب كورة وبصراحة كده لو صاحبت حد مش بيعرف يلعب كورة مش بكلمه تانى ، أنا عارف إني "over" لكن بحب كده جدا . ولما سألناه اهتمامك بالكورة بيأخد من وقتك كام ساعة يوميا ؟ قال لا كتير مقدرش احدد بس لو علي الفرجة على الماتش حوالي 4 ساعات .

- - وبالنسبة ل"إيمان 24 سنة" : قالت إنها بتتفرج على الماتشات كتير قوى ، لدرجة إنها لو مفيش ماتشات جديدة بتشوف حاجات معادة ، واليوم اللى ما اتفرجش فيه على ماتش بأحس إن فيه حاجة ناقصة وكمان بيخرجنى من المود .


"بحب أتنين سوا يا هنايا بحبهم الماوس والكيبورد"

- "سمر 25 سنة" : لو قاعدة في مكان مفيهوش كمبيوتر باحس إن المكان ده ناقص حاجة وبابقى عايزة أمشى منه ، وباقضى قدام الكمبيوتر مش اقل من 7 ساعات يوميا ، وهوة كمان بيحقق ليه سعادة كبيرة لدرجة إني حاسة إني لازم ابتدئ اقلل منه.

- "أمل 24 سنة" : بضيع في الانترنت وقت فراغي بيسليني عادى ، ولو حسيت انه أتحول لإدمان هاقلل منه بس مش هابطله .

- "رضوى 21 سنة" : بحب ال "chat rooms" قوى وبأحس إني عندي أصحاب جامدين ، وما اقدرش أعدى اليوم من غير ما أقابل أصحابي وهما كمان بيقلقوا عليه ، وبكون متضايقة جدا لو الكمبيوتر حصله "damage" أو حاجة شغلتني .


" مع التليفزيون مش هتقدر تغمض عينيك"

- "أروه 19 سنة" : بحب التليفزيون جدا ، وهو اللى مجمعنا مع بعض في البيت ، وخلاص أنا أتعودت عليه ،و بيحقق ليه سعادة كبيرة .

- "مروة 23 سنة" : التليفزيون بالنسبة ليه بجد أتحول لإدمان بتفرج عليه يوميا في حدود 10 ساعات لدرجة إني ابتديت أحس انه هيسببلى ضرر وبقيت أحاول اشغل نفسي بأي حاجة تانية .

- "أسماء 21 سنة" : عندنا تليفزيون في كل اوضة ، وكل واحد بيتابع القنوات اللى بيحبها ، أنا شخصيا تليفزيون اوضتى مفتوح 24 ساعة حتى إني بنام وهوة مفتوح ولو مش مفتوح مش بيجيلى نوم .


يا أهل المغني:

- "شيماء 17 سنة " ، "ندى 19 سنة" كان كلامهم تقريبا شبه بعض ، وقالوا عندي كل الحاجات اللى ممكن اسمع بيها أغاني زى الmp3 والموبيل والتليفزيون والراديو والكاسيت ، لازم تبقى أي حاجة منهم معايا طول اليوم ، فصعب جدا اعرف أنا بتعرض للاغاني قد إيه يوميا ، وكمان برتاح جدا لما بسمع أغاني خصوصا للمطربين اللى بحبهم وبتفاعل معاها جدا، يعنى لو أغنية حزينة بعيط كأني أنا اللى عندي المشكلة ، ولو أغنية سعيدة ببقي فرحانة جدا .
"متنوعة يعنى "أكيد مش هنبقى بتكلم عن الإدمان ومنجبش سيرة الباشا "السجاير" ، فمثلا
- "محمد 25 سنة" : أتعودت عليها جدا ، ولازم السجاير معايا طول اليوم ولو مش معايا أو حاولت أبطل ببقي مكتئب ومأريف ومتعصب جدا ، وأنا عارف طبعا إنها بتسبب ليه ضرر كبير بس مش هاحاول أبطل .
محمد يا جماعة على سبيل المثال لا الحصر طبعا .

- "محمد 26 سنة" : بحب الخروج من البيت جدا مش مهم أروح فين ولا مع مين ، المهم إني أفضل بره البيت كتير وخلاص ومفيش ضغوط في البيت ولا حاجة أنا اللى بحب كده ، ولو يوم ما خرجتش بابقى مكتئب.

- "هيثم 23 سنة" : أنا مدمن مقالب ، ممكن فكرة مقلب ماقدرش أنام من التفكير فيها لغاية لما أنفذها ، وأحس إن يومي غريب لو ما اتحطتش في مغامرة وخرجت منها ، وده طبعا ممكن يعملى مشاكل مع أصحابي شوية بس هما خلاص حفظوني.

- "ياسمين 19 سنة " : هوة أنا محرجة شوية لكن هاقول إن الشخص اللى أنا مرتبطة بيه هوة محور حياتي برتب على أساسه يومي ، والحاجات اللى بترضيه بعملها واللي مش بترضيه مش باعملها خالص ، ولو هنقول إن ده إدمان يبقى أنا مدمناه .

- "جهاد 21 سنة" : النوم أهم حاجة في حياتي وبأهتم جدا بمكان نومي وكل التفاصيل وبنام تقريبا من 10 إلى 12 ساعة ، وبتعصب جدا لو نومي قل عن كده .

- "عمر 23 سنة " : بحب شغلي جدا وأتضايق قوى لو ما اشتغلتش ، حتى في يوم الأجازة أقعد أفكر في شغل اليوم اللى بعده ، وسعيد قوى إني أنا كده وحاسس إني هانجح إن شاء الله .

ولما أخدنا رأى الطب النفسي في مسألة التعود وإدمان العادات فقابلنا د/ عمرو الشربينى وسألناه عن تعريف الإدمان فاقلنا :
إن الإدمان هو أي عادة الواحد بيتعود عليها وتقهره (بمعنى أنها بترتبله يومه ويمه يبقى غريب لو ممارسهاش ) ويشعر بصعوبة في الإقلاع عنها .

وقالنا كمان انه شاع استخدام كلمة إدمان عند الأطباء النفسيين على كل حالة عندها تعود من هذا النوع ، فابتدوا يقللوا استخدام كلمة إدمان. وأضاف د /عمرو أن المرحلة العمرية مهمة في تحديد نوع اكتساب العادة وتأثيرها ، وإن في مرحلة الشباب كتير منهم بيلاقى حل لمشكلة الفراغ اللى عنده فبيدور على عادة تخرجه من الفراغ والاكتئاب فأحيانا بتتحول إلى إدمان .

ولما سألناه عن الشباب المتعودين على الكمبيوتر والانترنت والتليفزيون ، فقلنا إن كل ديه بدائل يطرحها العقل على الإنسان واسمها العلمي ""virtual world أو العالم الافتراضي وده لان الكمبيوتر والتليفزيون والانترنت يقدروا يعملوا بديل عن العلاقات الاجتماعية المفقودة في حياتنا وبالتالي تنشأ علاقة افتراضية بين المشاهد وبين المذيع أو ممثل معين ، وأيضا بالنسبة لل"بروزر" وبين "chat rooms" معينة .

وأيضا من آراء د/ عمرو إن أول مراحل من معالجة الإدمان حتى ولو كان إدمان عادات ، فأول المراحل ديه هي إننا ندور عن الأصول اللى ففقدها المدمن ونبحث لها عن بدائل ، وبشكل مبدئي لازم نعترف بالعادة ونقبلها أولا علشان نقدر نغيرها ثانيا .

كل الكلام اللى أتقال يبين لينا بجد إن رأسمال الواحد هو وقته وإننا مش بنرفض أي عادة بس المهم إن العادة دى تكون في رضا ربنا وتخليك طول الوقت ال"upper hand" في التحكم وترتيب يومك ومتخليش عادة مهما كانت هي اللى تتحكم فيك ، لأنه ببساطة تخيل نفسك يوم القيامة جاي وواقف وراء تليفزيون أو بنت أو سيجارة فوقتها هتقول أنا مكنتش بقول غير " لا إله إلا الله" لكن أعمالك بتقول حاجة تانية

طبعا كلنا كده وانا واحدة منكم بس ياريت نحاول نصلح ....
بنتظار ردودكم

:موضوع جميل جدا :انت انسان مبدع دمتم بخير

موضوع جميل جدا وفعلا انتي بتتكلمي صح

شكرا لردك الجمي

:مشكووور:

شكرا لك

:موضوع قمة الجم

تسلم ايدك على الموضوع

شكرا لردك الجمي

شكرا على الموضو

شكرا لك