لما الناس تزعل من اختلافك معهم فى الراى و عايزينك توافق على كل كلامهم... بدون اعتراض او اختلاف ............. يبقى حاجة تقرف
لما السياسى يكدب – حتى وهوا حالف يمين الله – لما يكدب عشان يرضى الى فوقه، و ينسى اللى فوق الجميع ............. يبقى حاجة تقرف
لما ناخد صفر فى المونديال و منتعلمشى شىء.... و نرشح فاروق حسنى لرئاسة اليونسكو بدون ما نتوقع صفر جديد ............. يبقى حاجة تقرف
لما الفنان يمثل دور فى عمل فنى وهوا عارف ان العمل مفيش فيه اى افادة للبشر و ينسى رسالة الفن الحقيقية.... عشان سبوبة او نحتاية ............. يبقى حاجة تقرف
لما شاعر كبير زى الابنودى يجيى بعض المثقفين يحاربوه بدون مسوغات ادبية تسمح لهم بكده – ااقروا كلامه فى الدستور امس و هتعرفو كل حاجة - ، يحاربوه لمجرد انه ااقرب شاعر لقلب الناس ............. يبقى حاجة تقرف
لما كل – رجل شرقى.. و أنا من ضمنهم طبعا – يرفض الاعتراف ان جواه ديكتاتور.. بيظهر خصوصا وقت ما يكون مطروح مساحة نقاش لاخذ قرار فى البيت او الشغل او حتى مع اصحابه............. يبقى حاجة تقرف
لما الزوج يمارس انفصامه الشخصى على مراته او اولاده و يرفض ان يكون لهم رأى او وجهة نظر مستقلة بلاش مختلفة عنه ............. يبقى حاجة تقرف
لما الزوجة تمارس الاضمحلال الفكرى وتنقط جوزها بتفاهتها و سخافة افكارها و تنسى ان المراة لا يمكن اختزالها و اختصارها فى عقل راكد او لسان سليط............. يبقى حاجة تقرف
لما صاحبك او صديقك او زميلك.... يشوفك مجرد متلقى فقط و يلغى عليك حق عقلك فى التفكير و يتولى هوا - اسم النبى حارسه – و يتولى هوا التفكير واخذ القرار و يمكن الفعل لاحقاً بالنيابة عنك.. ............. يبقى حاجة تقرف
لما الناس فى عالم التدوين أحد الفطاحل – وائل عباس .. الوعى المصرى - على سبيل المثال وليس الحصر – يتعرض لحذف شغلو و مضايقة من المواقع العالمية بدون ما نقف جنبه ونسانده و نكتفى بالفرجة كالعادة .. ............. يبقى حاجة تقرف