العنوان: انا مش حغش في الامتحانات تاني, حمله للقضاء على الغش
السلام عليكم ورحمة الله وبركاته
الحمله دي للناس اللي قررت انها مش حتغش في اي امتحان
مهما كان صعب ومهما كانت الناس حواليها
الحمله دي للناس اللي قررت انها حتتقي ربنا مهما حصل وان لو مغشتش يبقى اكيد ربنا حيوفقها
الحمله دي للناس الي قررت انها متدخلش في فلوسها مليم حرام, فقررت انها متغشش في أي امتحان عشان متاخدش منصب مش بتاعها
الحمله دي للناس اللي قررت تمشي ورا خطى الحبيب صلى الله عليه وسلم, ولا تكون ممن قال فيهم: (من غشنا فليس منا)
قبل ما تقول انت ليه بتغش, قبل ما تقول غصب عني, قبل ما تقول ربنا يسامحني, هل تعرف انك لو غشيت في امتحان وجبت نص درجه زياده, النص درجه دي جابتلك منصب مش بتاعك كان المفروض يكون لغيرك, هل انت واعي 100% ان كل مليم حتاخده من المنصب ده حيكون مال حرام؟؟؟هل عندك استعداد تأكل عيلتك في المستقبل من مال حرام؟
هل عندك استعداد انك لا يستجاب ليك اي دعاء من الله, كله بسبب الامتحان الفلاني اللي غشيت فيه وجبت نص درجه زياده؟
طب لو كانت كل امتحاناتك بتغش فيها, حتروح فين من ربنا لما تاخد رزق غيرك اللي كان احق بالمنصب اللي انت خدته بالغش
كل ده بسبب ايه؟؟؟ انت بتبيع آخرتك بدنياك عشان امتحان؟
لو كانت الدنيا كلها بتغش مش معنى كده ان الغش بقى حلال
لو كان الغش ينفع لو المراقبين سابوك, يبقى افتكر ان ربنا مازال رقيب عليك وغير راضي عن الغش
لو كان الغش في الامتحانات الصغيره موضوع تافه بالنسبالك
تأكد ان الغش عند الله عظيم
لو كان الغش خوفا من السقوط عشان مش مذاكر
يبقى احسنلك تسقط في الدنيا ولا تسقط في الآخره, في الآخره مفيش دور تاني
لو كنت ناوي تتوب من الغش بعد ما تنجح, يبقى صدقني مش حتعرف تتوب منه, وحتغش تاني وتالت ورابع, ولو تماديت متأمنش مكر الله, يمكن يختم على قلبك وميمكنكش من التوبه ابدا
لو كنت بتغشش صحابك وخايف لو بطلت تغششهم يزعلوا منك, فيؤسفني اقولك, كلهم في ميزان سيئاتك ومفيش حد منهم حيغني عنك عذاب الله, ومن ارضى الناس في سخط الله غضب الله عليه واسخط عليه الناس
قرر من اللحظه دي
انك مش حتغش او حتغشش في أي امتحان او اي حاجه تانيه
وانك من هنا ورايح حتتوكل على الله , وعندك يقين كامل ان ربناحيكرمك
حيقولوا عليك انت غريب, اتجننت, حتعمل غير الناس ليه؟
افتكر ان حبيبك صلى الله عليه وسلم اتقاله نفس الكلام لما دعا للاسلام
وافتكر ان حبيبك قال: (بدأ الاسلام غريبا, وسيعود غريبا كما بدأ, فطوبىللغرباء)
وتأكد ان ربنا وحده اللي بيرزق, فلو اتقيت ربنا يبقى عليه هو الرزق
الطريق الوحيــــد للنجاح هو طريق ربنا